Raha tsy ivelomana marina ny KOLONTSAINA maha-malagasy dia tsy haharitra ny fampandrosoana | Blaogin'i leboda

« Mialoha | Manaraka»

Raha tsy ivelomana marina ny KOLONTSAINA maha-malagasy dia tsy haharitra ny fampandrosoana

Ankafaliana sy ampanetretena no mba itondrana ny hevitra eto.
Inona tokoa moa ny angovo anaty mampandeha ny olona iray sy ny manodidina azy? Ny kolontsaina no sisa tavela rahefa lasa avokoa ny zava-drehetra hoy ny fitenenana izay.
Io kolontsaina io no hery fanoitra mitondra satria ao daholo ireo Soa toavina nifandovana ka ananana izay fomba fijery sy fisainana miatrika toe-javatra mitranga na atrehina isanandro.
Mbola manana izany kolontsaina izany ary ve isika malagasy? Eny tsy ampisalasalana ny valiny saingy hatraiza no mbola ivelomana azy ankehitriny?
Raha tonga teto antanindrazana ny fivavahana dia nolazaina fa asan'ny demony sy Satana ny fomban-drazana ary nohamafisin'ny fanabeazana sy fisainana tamin'izany fa efa lany andro izany fomba amam-panao izany.
Dia nanao izay ho afany ireo mpanjanaka satria isan'ny tetikady izany tamin'izany fotoana izany ka ny fomba amam-panao frantsay sy tandrefana no filamatra ary nosokajina ho mihemotra sy tsy liam-pandrosoana izay tsy mianatra sy tsy manaraka ny fomba rehetra tamin'izany.
Lasa ny mpanjanaka ary mahaleo tena isika efa 48 taona izay. Inona no zavamisy?
Ny fivavahana tsy naharesy lahatra satria amin'ny andavanandro dia mampiseho fomba sy fiainana sadasada ireo kristianina ka tsy afaka mampiseho ilay fiaraha-monina voalazan'ny Asan'ny Apostoly fahizay.
Etsy andaniny ny fomba frantsay tsy afaka nosalorana ny fombany satria akanjo tsy sahaza antsika.
Inona ary izany no atao? Fa inona no fiantraikan'ireo?
Tsy mety mandroso isika, nefa ny harena ananana misy, ny olona sy ny fahaizana misy be dia be ary isika malagasy no voalohany aty Afrika.
Ny antony tsy misy sahy mamaky bantsilana dia ny fahaverezan'ny kolontsaina na ny marina kokoa dia ny fahasimban'ny rafitra anaty ao amin'ny aty fanahy.
Mitovy amin'ny Solosaina isika raha oharina, ka efa nisy rafitra (systeme) ao voajanahary.
Samy niezaka ny Fivavahana sy ny fanabeazana tandrefana nanova io rafitra anaty (fisainana) io fa tsy nety niorina lay izy fa misy tsy mety mifanaraka (incompatible).
Inona ary no atao? Mbola ao aloha io rafitra anaty io fa mila diovina fa be izay otrikaretina nikiky azy tao izay (virus). Ny fifampidinihana amin'ireo Ray aman-dreny akanga sisa nanamborana sy ireo manam-pahaizana mikirakira izany mba hahafantarana marina ny tena nisy tamin'izany sy ny hevitra tao ambadika rehetra (ity no tena zava-dehibe).
Hivoaka ireo Soa toavina nimatimatesan'ireo razantsika rehetra. Dia halalinina izany ary jerena ny fanasivanana azo atao.
Izany hoe tsy kasihina lay rafitra anaty maha-malagasy fa ireo Soa toavina na hairaha sy haizatra no karohina ny hifanarahany amin'ilay rafitra anaty eo.
Iverenako lay ohatra mikasika ny Solosaina iny hampazava ny tian-kambara : tsy ovana ny rafitra anaty malagasy (systeme) fa lay Soa toavina vaovao na ny hairaha sy ny teknika no tefena mba hifanaraka amin'ilay rafitra ka tsy hanimba azy. Raha adika amin'ilay solosaina teo dia ny fahafahan'ny "Microsoft Office" ampiasaina amin'ny rafitra "Macintosh" sy ny fahafahan'ny rafitra "Windows" mampiasa ny "Adobe Photoshop" ary toy izany koa ny rafitra "Linux". Fanajana ny fisian'ireo rafitra ireo sy ny safidin'ny mpanjifa izany rehetra izany.
Toy izany koa ny tiana resahana eto. Hajaina ary asongadina ny kolontsaina malagasy rehetra. Anjaran'ireo Soa toavina hafa, ireo hairaha hafa, tosakevitra isan-karazany no mampifanaraka amin'ilay rafitra malagasy.
Ajanoko eto aloha fa miandry ny valin-kafatra aho sy ny fanontaniana mba hahafahan-tsika miady hevitra.
Amin'ny manaraka indray e!
 
LEBODA IHANY E

(2) Hametraka hevitra    (0) Verindrohy (trackback)   

Hevitra 2 "Raha tsy ivelomana marina ny KOLONTSAINA maha-malagasy dia tsy haharitra ny fampandrosoana"

  1. simp said:

    08/01/2009, at 16:24 [ Valio ]

    ny tena marina dia ireo rafitra maromaro ireo no miezaka mandavo ny rafitra sasany.
    Dia izay matanjaka sy tonga aloha ihany no tena manjaka avy eo...

    ps: diso teorika be ilay resaka :-P


  2. mpandalo said: miova isanandro ny kolontsaina

    08/01/2009, at 19:48 [ Valio ]

    Mijery mitanila ihany isika raha ny fidiran'ny fivavahana sy ny kritsianina sy ny mpanjanatany no ampangaina ho fototry ny "fahaverezan'ny kolontsaina "
    Na dia nosy aza isika dia tsy nanana hery nanoherana ny fibosesehin'ny kolontsaina vahiny teto.
    Jereo fotsiny anie ny resaka internet sy fitontoloana amin'izao fotoana izao , jereo ny sarimihetsika, ny boky ny fomba fitafy avy ivelany daholo no tafatsofoka eto ary sarotra sakanana!

    Ny teboka niaingana mihitsy no tsy nanampy antsika : Tsy nanome lanjany loatra ny fiainana ara-pitaovana isika taloha fa saika niompana amin'ny resaka ara-panahy sy finoana ny fomba fijerintsika ny fiainana. Tao no nanovozantsika ireo nantsoina hoe fahendren'ny Ntaolo.

    Maro ireo manam-pahaizana ara-tsiansa any ivelany any no nanao fikarohana ary nahita vokany izy ireo ; ny teto amintsika anefa dia zavatra hafa mihitsy no nameno sy nitazona ny tontolon'ny fiainantsika, ireo angamba no antsoina ankehitriny hoe soa toavina izay rehefa nifandona tamin'ny kolontsaina vahiny dia niondrika , tsy nanjavona tanteraka akory fa mitsilopilopy eny ihany saingy tsy manan-kery hanohanana hijoroana intsony.

    Ny kolontsaina rehetra eto an-tany anefa dia mifandona foana ary miova saika isanandro mihitsy . Maro ny fiangonana any Frantsa ohatra no navadika ho zavatra hafa : trano famakiana boky, trano fivarotana fanaka, restaurant ary misy aza nanjary discotheque mihitsy ka ilay mopera teo amin'ny altara dia nosoloin'i DJ......
    Tsy ahy ny mitsara hoe fivoarana ve izany sa inona fa dia samia mieritreritra daholo isika fa ny kolontsaina dia zavatra mihetsika fa tsy mipetraka amin'ny toerana iray.